Login
Comunité
Ann Sant dla Misericordia 2016
Peregrinaje di Ladins a Porsenú, la sabeda ai 23 d'aurí 2016
L'ann 2016 é gnü protlamé dal papa Francësch sciöche ann sant straordinar, dediché ala misericordia; al á metü man en la festa dl'Imacolada, ai 8 de dezëmber 2015, y se röia en la domënia de Crist Re, ai 20 de novëmber 2016. N ann sant dess renforzé la fede y ti dé vita nöia; nia sciöche n pëis y n dovëi ne dessun la tó sö, mo sciöche n aiüt y na ligrëza por nosta vita che vá sura la mort fora. L'ann sant é ince lié a na induliënza plenara ch'an davagna ales condiziuns conesciüdes, passan ite por öna dles portes santes gnüdes daurides dal papa a Roma y da nosc vësco tl dom da Porsenú, tl dom da Balsan y tl santuar da Weissenstein. I orun tó sö l'invit y passé ite por öna de chëstes portes santes, se lascian ite sön la misericordia de Dî, che la Dlijia ó nes mëte a cör; al é la misericordia de Dî cun nos, mo ince la misericordia che nos instësc dessun avëi cun la jënt y cun le monn incër nos ia.
La fede n'é nia val' ch'i sciafiun ma da avëi y da pratiché por nosc cunt, mo al é na scincunda de Dî ala jënt, ch'ara la vires en comunité y la dais inant da na generaziun al'atra. Cun le bato sunse tuc ite tl popul de Dî, che é sön tru adincuntra ala patria eterna. Vigni iade ch'i jun por sanc o ch'i fajun n peregrinaje, se recordunse ch'i sun söl iade fora por le tëmp y ch'i sun ma ghesć sön chësta tera. Le peregrinaje plü indiché dala Dlijia por chësc ann sant é bëgn n peregrinaje che nes condüj pormez y ite por na porta santa. Insciö él sté i ploans dla Val Badia y de Gherdëna che s'á abiné y che inviëia trames les valades ladines de nosta diozeja por la sabeda di 23 d'aurí 2016 a n peregrinaje deboriada da Milland al Dom da Porsenú y da dailó inant a Neustift.
Al ti stá dër a cör ai ploans de trames les valades ch'al vëgnes a s'al dé n bel peregrinaje cun tröc peregrins, animá da entusiasm y ligrëza por la misericordia de Dî.
Da trames les valades él deplü corieres che pëia ia y che nes condüj a Milland por les 9.30.
Do na funziun d'introduziun tla dlijia de Sant Ujöp Freinademetz dales 10.00 pëia spo ia la prozesciun cuntra Porsenú che passará por la Porta Santa ite tl Dom a festejé l'Eucaristia.
Do marëna tl'Academia Cusanus y tl Seminar vá dales 14.00 la prozesciun inant a Neustift, da olache les corieres piará ia dales 16.00 indô cuntra ciasa.
Al passenëia dër da pié ia dala dlijia da Milland dedicada a Sant Ujöp Freinademetz, che é sté n ejëmpl ví dla misercordia de Dî y che á insciö davagné tröc cörs por le rëgn dl cil.
Le peregrinaje ite por la porta santa tl Dom da Porsenú nes liëia ite tla Dlijia de nosta diozeja. Al é le post olach'al é sté da mile agn incá la sënta de nosc vësco, sciöche suzessur di apostui de Gejú Crist. Insciö n'orunse nia ma s'uní cun la comunité di peregrins de nostes unités pastorales, mo se daurí ince ala comunité diozejana y ala comunité cristiana universala. Por davagné l'induliënza, che stá te nosc dejier sinzier do na dërta converjiun, él dërt ch'i se metunse nia da susc, mo deboriada sön tru: la fede crësc y ciafa forza sc'ara vëgn partida. L'esperiënza plü sota dla misericordia divina podunse spo fá tla zelebraziun eucaristica tl dom.
Do la marëna deboriada vá la prozesciun sö cuntra la Basilica dl convënt da Neustift, che nes orientëia te süa richëza ornamentala söla gloria dl cil. Sostignis dala fede y dala misericordia de Dî y cun l'aspiraziun de incunté le Signur te döta süa gloria, s'un junse, do na zelebraziun de lalt y de rengraziamënt, indô a ciasa ite dla vita da vigni dé.
Te osta plata dla ploania vëgnel lascé alsavëi pro che ch'al é da s'anunzié y da paié ite 25 euro por le iade y la marëna. Por savëi adora assá co s'organisé, vëgnel perié da s'anunzié cina le mertesc, 01 de merz 2016.
Oraziun de Papa Francësch por l’Ann Sant
Signur Gejú Crist, tö s’as insigné, da ester misericordusc sciöche le Pere sö al Cil, y t’as dit che chi che te vëiga te, vëiga Ël. Mostresse so müs y nos sarun salvá. Tüa odlada plëna d’amur á delibré Zacheo y Mateo dala sclavité di scioldi; la piciadëssa y la Madalena da chirí la felizité ma te na creatöra; ara á fat pité Pire do le tradimënt y ti á assiguré le Paraisc al ladrun pentí. Fá che vignun de nos ascutes la parora che te i as dit ala Samaritana, sciöche sce ara foss dita personalmënter: „Sce te savesses te ci che al stá la scincunda de Dî!“ Tö es le müs che i odun dl Pere che i n’odun nia, de Idî che manifestëia süa potënza dantadöt tl pordonn y tla misericordia. Tö as orü che tü ministri foss sotmetüs ala deblëza, por sintí la dërta compasciun cun chi che vir tla ignoranza y tl tort. Mëna fora to Spirit y consacrëiesse düc cun süa unziun, por che l’ann iubilar dla Misericordia sides n Ann de grazia dl Signur y che tüa Dlijia pois porté cun entusiasm nü ai püri la bona noela, incundé ai prijoniers y ai sotmetüs la liberté y ti dé ai verc la odüda. Insciö te periunse, por la interzesciun de Santa Maria, la Uma dla Misericordia, te che te vires y te regnëies cun le Pere tla Unité dl Spirit Sant, por düc i secui di secui. |
MISTERS DLA DIVINA MISERICORDlA
Pröm mister de misericordia
Geju incunta la samaritana pro le fistí de Iacob
Geju ó ti daurí le cör. Al la prëia do ega y ara s'intënn che ëra á instëssa sëi. Ara resta imprescionada da chesta incuntada y ti fej a Geju chës domandes sotes ch'i un ince nos daite, mo ch'i ne s'intopun gonot nia da ti fá.
Secundo mister de misericordia
Geju vá a chirí la biscia pordüda
A Chël Bel Dî él vigni biscia che ti stá a cör öna por öna. Y sc'al n'é ince ma öna che va a perde, odunse döt so amur y süa soferënza. Gejú, le bun famëi , é gnü a dé ca süa vita por sües bisces.
Terzo mister de misericordia
Geju incünda la misericordia dl Pere che tol sö le fi pordü
Sovënz se mancel l'ardimënt y la confidënza da jí indô da Chël Bel Dî. Mo ël nes mantëgn la fedelté: al n'aspeta nia ma, al nes vëgn cinamai adincuntra.
Cuarto mister de misericordia
Gejú ti pordona ala ëra adultera y a chi che á fat picé
La misericordia é la manira sciöche Chel Bel Dî pordona. Chiló odunse le comportamënt misericordius de Geju. Al defënn le piciadú dan dai nemisc, al straverda le piciadú da na condana che podess ince ester iüsta. Al pordona cun na aicia.
Cuinto mister de misericordia
Geju söla crusc tol sö le ladrun te paraisc
Ince söla crusc sighita Geju da se tigni pro l'amur y la misericordia por podei abrace döt y düc. Dal amur y dala misericordia, che é tan gragn da n'avëi degöna mosöra, vëgn ince l'ultima parora: "Incö saraste cun me a paraisc"
Pelegrinaj a Porsenú en sabeda ai 23 d’auri 2016
Link a Plates Web
Apps
Oraziun por l'ann dla Misericordia
Supliches pur l'ann dla Misericordia
Spligaziun dl logo
Gejú, so Fi, é gnü tl monn a nes mostré la misericordia dl Pere y a nes insigné da ester misericordiusc ince nos. Te chësc vers nes dëida le dessëgn ch’i un dan da nos te dlijia y ch’i incuntarun tres indô en chësc ann.
Al esortëia da vire la misericordia do l’ejëmpl dl Pere che nes racomana da ne iudiché y condané nia, mo da pordené y da scinché amur y pordon zënza mosöra.
Le dessëgn, che é n’opra d’ert dër garatada dl pater iesuit Marko Ivan Rupnik,
liëia adöm les maius espresciuns teologiches dla misericordia.
Al mostra le Fi de Dî, cun les plaies, che se ciaria sön sües sciables le chestian pordü. Al é na imaja, dër aprijada dala Dlijia di pröms tëmps, che significhëia l’amur de Crist che completëia süa incarnaziun cun la salvëza.
Le dessëgn mët a löm tan sot che le Bun Famëi röia en contat cun le chestian;
y al le fej cun n amur tan gran, ch’al é bun da ti mudé la vita.
Le Bun Famëi porta l’umanité sön sües sciables cun na misericordia straordinara:
sü edli vá a s’uní cun chi dl chestian ch’al porta. Crist vëiga cun i edli de Adam
y Adam cun i edli de Crist.
Te Gejú Crist vëiga vigni chestian süa condiziun umana y so dagní che l’aspeta, contemplan tl müs de Crist l’amur dl Pere.
Chësta scena é dessignada ite tla cornisc de na mandorla; ince chësta configuraziun vëgn dant tles pitöres di pröms tëmps y tl’eté mesana dla Dlijia y simbolisëia les döes natöres de Crist, la divina y la umana.
I trëi cërtli bröms, che vëgn caifora tres plü lominusc, significhëia le movimënt de Crist che condüj le chestian fora dla nöt dl picé y dla mort adicuntra al lominus. Dal’atra pert é le corú scür ite amez sëgn dla profondité dl amur dl Pere che pordona döt.
(cina chiló la spligaziun ofiziala)
I podun ince ciamó odëi d’atri simboi, sciöche la biscia che s’á inrabí, le fi pordü, le bun samaritan, le bun ladrun söla crusc.
Ince i corusc á so significat: le cöce é le corú dl sanch, dla vita, dl amur de Dî
le blanch é le corú dl lominus dla Trinité, dl Spirit de Dî y de Gejú Crist,
le bröm é le corú dl chestian che é la creatöra sora buna da odëi le cil,
le fosch é le corú dla nöt y dla mort,
le vërt indoré (dl guant dl chestian) é le coru dla creaziun söl tru da gní salvada.
valutaziun
Submitting your vote...
Submitting your vote...