Oraziun

Amè siur Heinrich,

tö as vit danter nos y as incundé cun gran conviziun
la ligra noela de Gejù Crist y l'amur de Dî.

Cun gran fidanza gnunse da tè, deache tö nes as ascutè sö
cun gran paziënza y benevolënza; nes as consolè y encorajè:
sides tö nosc interzessûr pro Chël Bel Dî, nosc Pere!

Dëidesse vire plëgns de speranza tla fede cristiana.
Prëia por dötes les families, ch'ares crësces tl amur y tla fidënza,
tla pêsc y tl'unité.

Ćiara cun benevolënza söi mituns, söla jonëza y sön vignun de nos:
fa che capiunse, ciügn ch'è veramënter i dër valurs y le significat dla vita.
Chërda jö sön nos la proteziun de Dî y l'ispiraziun dl Spirit Sant,
che chiriunse tres ma le bëgn y che sunse bugn da nes mëte cuntra le mal.

Tòlete particolarmënter sura de chi che patësc por gauja de crusc,
de maratia y de surité. Nos gnun da Tè cun nüsc fistidi
y nüsc problems personai y confidun te tüa interzesciun
pro Chël Bel Dî, nosc Signur.

Fora de süa vita

Siur Heinrich Videsott é nasciü ai 03 de messè 1912 a Mantëna todëscia, na picera fraziun dl comun da San Laurënz. Al é gnü consacrè prou a Porsenù l’ann 1937 y à metü man süa misciun da caplan y spo da ploan te deplü cöres dla diozeja da Porsenù. L’ann 1964 él rovè a La Val y é stè dailò famëi spiritual ćina ch’al é jü in ponsiun l’ann 1987.Spo él romagnü a La Val ćina süa mort ai 09.12.1999.Siur Videsott se fajô notè por süa gran disponibilité y süa paziënza da ascutè sö chi che gnô da ël por gnì daidà te sües pices o gran soferënzes dl corp y dl’anima.Sciöche n bun pere, àl dagnëra parores de confort y cun sües oraziuns, so carisma y süa benevolënza êl bun de daidé tröpes porsones, che le chirî cun fiduzia y le periâ do süa interzesciun prò Chël Bel Dî. Süa benedisciun ê dagnëra fontana de grazies y de richëzes spirituales. Al periâ dër tröp y viô na fede scëmpla mo tlera. Al n’ê nia ma conesciü te süa ploania y te nosta valada, mo te döt Südtirol y jö por la Talia. Deache tröc reconësc d’ester gnüs daidà por süa interzesciun, é süa stima ćiamò chersciüda dô süa mort y à arjunt y superé i confins dla Talia.