Josef Mayr-Nusser é nasciü ai 27.12.1910 sön le lüch „Nusser“ a Balsan dala pert de Bozner Boden. Bele cun cin’ agn ál pordü so pere. Dala uma manajënta y devota essel arpé le talënt da jí a studié, mo deach’al ê bele so fre Jakob che studiâ, ne s’infidâ Pepi (Josef) nia da perié la uma da podëi ince ël jí a studie. Sciöche d’atri lüsc, l’â ince le lüch „Nusser“ albüda ria sot al fascism por gauja dl’espropriaziun de terac sot a prisc.

Pepi ê jü a imparé boteghier pro la firma Eccel a Balsan. Te so tëmp lëde liôl tröp y ciarâ da se formé instës inant tla fede, tolon por ideai sanc y personaji che â dé testemonianzes stersces por la fede y la dlijia catolica.

L’ann 1931 êl gnü cherdé ite pro i soldas tl Piemont. Dedô êl jü pro la Conferënza de San Vinzënz y â  spo instës metü sö na conferënza tla cöra de Bozner Boden. Pepi, che ê gnü nominé presidënt, tolô chësc compit dër söl sciode y jô a ciafé i püri. Al ê ince sté ala pert da mëte sö le Grup Catolich di Jogn y ê gnü metü surastant. Pepi se dedicâ cun corp y anima a chësta inciaria. Al ti stô do ai grups di jogn, scriô y menâ fora lëtres d’informaziun y scriô articui por le foliet di jogn „Jugendwacht“. Te un di articui pón lí fora la motivaziun ciodí ch’al s’á spo refodé da dé jö le juramënt de fedelté al sistem nazionalsozialist. Al ti dá na gran importanza ala testemonianza zënza parores che n cristian autentich dá te süa vita da vigni de a ciasa, söl laur, sön ciampopré, te fujina, dan dala jënt, y al ester testemone de Crist „cina a morí“.

Dales opziuns ál tut, en contrast cun la maioranza di südtirolesc, la dezijiun da sté tla patria. Al s’â lié al „Andreas-Hofer Bund“ che s’un tolô sura de chi che n’â nia opté. Ai 26.05.1942 âl maridé süa superiura pro l’Eccel, Hildegard Straub, y bun n ann do él gnü al monn le fi Albert. Intratant âl baraté patrun y ê jü a lauré pro la firma Amonn. Amonn le tignî alalt y l’aprijâ dër sciöche colauradú.

De setëmber 1943 é Südtirol gnü ocupè dales trupes todësces. Scemia che Pepi ê zitadin talian, êl gnü cherdé ite pro i soldas todësc. Cun 80 d’atri compagns de Südtirol êl rové a Koniz tla Porussia Orientala, olache düc ê gnüs metüs pro la Waffen-SS. Pepi â fat impara l’adestramënt, mo le de denant co dé juramënt âl detlaré ch’al ne sciafiâ nia da dé jö le juramënt por gauja de süa cosciënza. Sü compagns porvâ da le baié sö. Al respognô indere, ch’al savô bëgn che la refüsa ti ess costé la vita, mo che süa cosciënza cristiana ti proibî da s’astilé atramënter. „Sc’al n’é mai degügn che á l’ardimënt da ti dí, ch’ai n’é nia a öna cun sües idees nazionalsozialistes, ne se müdel nia“. Pepi â aldî cuntan dles crudeltês dla SS y n’orô nia se ciarié ados colpa ince ël. Pepi é naota gnü saré te na zela. A süa fomena ti âl scrit, ch’al ê sigü ch’ara es te so amur ince soporté chësta proa pesocia.

„Sce le Signur ghira n sacrifizé, spo dál ince la forza da le soporté.“ Mo al sperâ ince ch’ara ne rovass nia tan inant deach’al ê zitadin talian.

Impó l’àn condané a mort a Danzig cun la motivaziun de desdruziun dla forza militara, y al dô gní stlopeté a Dachau.

N soldá vardian che â messü acompagné 40 condaná a mort, á cunté che le comportamënt de Pepi ti ê jü a edl, deach’al ne s’la baudiâ nia y ch’al ê reconescënt por vigni aiüt. Al ê tan indeblí ch’al n’ê apëna plü bun da jí. A Erlangen â la ferata messü s’archité por otedé por gauja dles scines desdrütes. Dailó é Pepi mort dai strabac ai 24 de forá 1945 te n vagun dai tiers. Süa salma é naota gnüda sopolida a Erlangen y d’aisciöda dl ann 1963 éra spo gnü condüta söl Ritten y sopolida pormez al mür dla dlijia de Lichtenstern. Le vicar general dla pert todëscia dla diozeja da Trënt, Josef Kögl, â scrit de Josef Mayr-Nusser: N eró dla verité, n eró dla santité dl juramënt, n eró dla fede testemoniada – n ideal por la jonëza de Südtirol.

http://www.josef-mayr-nusser.it