Te chisc dis jará i Trei Resc fora por nostes ciases por porté la Bona Noela da Nadé y a damané do ofertes por proiec de solidarieté sura döt le monn. 

Te Südtirol él vign’ann encer 6.000 mitans y mituns co vá da ciasa a ciasa a cheie adöm ofertes por d’atri mituns – por mituns co ne stá nia söla pert da soredl dla vita. Desche i „Trei Resc“, ti vái do ala stera, co simboliseia na vijiun: n monn olach’an pó vire con dignité, olach’an se respeteia y olach’an é solidai önn con l’ater. Con Osta oferta sostigneise plü co 100 proiec sora döt le monn, danter l’ater tl’Africa, tl’Asia y tl’America dal Süd. Ara se trata de proiec d’aiüt tal ciamp sozial y pastoral, mo ince tla formaziun, co ven enviés ia y realisés deboriada con les porsones enteressades, por mioré le dagní dai mituns.

Dilan de cör! 
Schira Jonila de Südtirol